RUS
SMARTNEWS.KZ басылымының хабарлауынша, төрт миллиард теңгеден астам шығын келтірді деген күдікке ілінген қазақстандық Грузиядан ұсталды. Ол бірнеше ай бойы халықаралық іздеуде жүрген.
Ішкі істер министрлігінің мәліметінше, күдікті 2025 жылдың шілдесінен бері бой тасалап келген. Қазақстандық полицейлер грузиялық әріптестерімен бірлесіп, оны Рустави қаласында қолға түсірді.
Тергеу деректеріне сәйкес, ол бір топ адаммен бірге автонесие беру сылтауымен 2022–2024 жылдары Алматыда 232 азаматты алдап, 4 млрд теңгеден астам шығын келтірген.
Бұдан бөлек, Астана қаласының полиция департаменті іздестірген тағы бір қазақстандық Бішкекте ұсталды. Ол 2024 жылдың қазанынан бері қаржы пирамидасын құрып, басқарды деген күдікпен жасырынып жүрген.
Бұл ұстаулар ТМД елдері аумағында өткен «Розыск» жедел-профилактикалық іс-шарасы аясында жүзеге асқан. 15–16 сәуір күндері шетелдерде барлығы 39 адам ұсталып, тағы 189 іздеуде жүрген тұлғаның жүрген жері анықталған.