RUS
SMARTNEWS.KZ басылымының хабарлауынша, Астанада өтіп жатқан сот процесінде айыпталушы блогер Эльмира Төлегенова соңғы сөзін айтып, өз кінәсін мойындап, соттан бас бостандығынан айырусыз жаза тағайындауды сұрады. Сондай-ақ ол процессуалдық келісім жасауға өтініш білдірді.
Соттағы соңғы сөзінде Төлегенова бұл жағдайдың өздері үшін маңызды өмірлік сабақ болғанын айтты.
«Біз өзімізге үлкен қорытынды жасадық. Бұл жағдай біз үшін өмірлік сабақ болды. Заң бұзғанымызға шын жүректен өкініш білдіреміз. Құрметті сот, маған және жұбайыма бас бостандығынан айырумен байланысты емес жаза тағайындауды сұраймын. Сонымен қатар, сот кеңесу бөлмесіне кеткенге дейін процессуалдық келісім жасау туралы өтінішімді білдіремін», – деді ол.
Ол келісімнің барлық шарттары мен құқықтық салдары өзіне толық түсіндірілгенін де атап өтті.
Прокуратура тарапы бұл өтінішке қатысты нақтылау сұрап, сотталушылардың ұстанымын анықтауға тырысты.
«Бұл өтінішті тек өзі білдірді ме, әлде Ерболат Жанабылов та процессуалдық келісімге келуге ниетті ме? Сонымен қатар, заң талаптарына сәйкес, мұндай келісім үшін кінәні толық мойындау қажет», – деді прокурор.
Қорғаушы тараптың айтуынша, барлық шарттар мен салдарлар түсіндірілген, алайда келісімнің мазмұны құпия сипатқа ие.
Судья істі қарауды уақытша тоқтатып, бір сағаттық үзіліс жариялады.
Еске салайық, іс 2026 жылғы 13 наурызда Астана қаласының қылмыстық істер жөніндегі ауданаралық сотында қарала бастаған. Блогерлер Ерболат Жанабылов пен Эльмира Төлегенова сотты жабық өткізу туралы өтініш бергенімен, ол қанағаттандырылмаған. Дегенмен БАҚ өкілдеріне сот залында фото және видео түсіруге тыйым салынған.
Ал 22 сәуірдегі отырыста прокурор ерлі-зайыпты блогерлерге 4 жыл бас бостандығынан айыру жазасын сұраған болатын.