RUS
SMARTNEWS.KZ басылымының хабарлауынша, Шымкент қаласының қылмыстық істер жөніндегі ауданаралық соты бопсалау ісі бойынша блогерге қатысты үкім шығарды. Ол әкімдікке қатысты жағымсыз ақпарат жариялаймын деп қорқытып, ақша талап еткен.
Сот материалдарына сәйкес, айыпталушы жәбірленушінің беделіне нұқсан келтіретін және мүддесіне елеулі зиян келтіруі мүмкін мәліметтерді таратамын деп қорқытып, ақша бопсалаған.
Іс деректеріне қарағанда, 2025 жылдың қазан айында блогер әлеуметтік желілерде Шымкент әкімдігінің беделіне нұқсан келтіретін жазба жариялаған. Кейін әкімдік өкілімен кездесіп, мемлекеттік ақпараттық тапсырыс аясында 10 млн теңгеге келісімшарт жасауды талап еткен.
Сот анықтағандай, талап орындалмаған жағдайда ол әкімдікке қарсы жағымсыз материалдар жариялайтынын ашық айтқан.
2025 жылдың 6 қарашасында блогер анасының банк шотына 990 мың теңге аударым арқылы алған. Осыдан кейін құқық қорғау органдары оны ұстады.
Сотта айыпталушы кінәсін ішінара мойындап, бас бостандығынан айырмауды сұраған. Алайда сот оны кінәлі деп танып, 5 жылға бас бостандығынан айыру жазасын тағайындады. Үкім әлі заңды күшіне енген жоқ.
Журналист Михаил Козачковтың мәліметінше, сотталған блогер — Арай Енсебек. Бұған дейін ол қала әкімінің баспасөз хатшысы қызметін атқарған. Кейін жеке медиа жобасын іске қосып, мемлекеттік ақпараттық тапсырыстар арқылы табыс тапқан.
Алайда қаржыландыру көлемі қысқара бастаған соң, блогер таныс шенеунікке бірнеше рет хабарласып, 10 млн теңге талап еткен. Ақша берілмесе, өз медиасында теріс материал жариялайтынын айтып қысым көрсеткен.
Шенеунік бастапқыда келісім беріп, кейін құқық қорғау органдарына жүгінген. Ақша беру сәтінде блогер қолға түскен.
Айта кетейік, блогердің ұсталғаны 2025 жылдың 7 қарашасында белгілі болды. Сол кезде оның үйі мен кеңсесінде тінту жүргізіліп, тергеуге қажет электронды құрылғылар тәркіленген.