RUS
Астанада бөтеннің мүлкін жоюға оқталу ісі бойынша жергілікті тұрғынға үкім шығарылды. Бұл туралы қалалық прокуратура хабарлады.
Тергеу дерегінше, жас жігіт әлеуметтік желі, нақтырақ айтқанда Instagram арқылы қосымша табыс іздеп жүріп, 2 мың доллар үшін қылмыс жасауға келісім берген.
Ол алдын ала дайындалған жанғыш құрылғыларды тұрғын үйге қарай лақтырған. Үй ішінде адамдар болғанына қарамастан, айыпталушы әрекетінің салдарын түсіне отырып, азаматтардың өмірі мен денсаулығына нақты қауіп төндірген.
Қылмыс оның еркінен тыс себептермен соңына дейін жүзеге аспаған.
Сот оны бөтен мүлікті жоюға оқталу бабы бойынша кінәлі деп таныды. Бұған дейін өтелмеген соттылығы ескеріліп, 3 жыл 6 ай бас бостандығынан айыру жазасы тағайындалды.
Прокуратура әлеуметтік желілер арқылы ұсынылатын күмәнді “жұмыстардың” артында қылмыстық жауапкершілік тұрғанын ескертті. Мұндай ұсыныстарға келісу тек бостандықтан ғана емес, өзгенің өмірінен де айыруы мүмкін.