RUS
SMARTNEWS.KZ басылымының хабарлауынша, продюсер әрі актриса Баян Алагөзова «Қыз Жібек» фильміндегі аңызға айналған камзолға қатысты дауға пікір білдіріп, басты рөлді сомдаған Меруерт Өтекешоваға тосын сый жасайтынын мәлімдеді.
Продюсер әлеуметтік желіде арнайы үндеу жариялап, көпшілік талқысына түскен қызғылт камзолдың қазір өзінде сақтаулы тұрғанын айтты.
«Қазір бұл қамзол менде, жеті құлыптың ар жағында сақтаулы тұр. Оны маған осы жәдігерді жылдар бойы көзінің қарашығындай сақтаған әйел табыстады. Қамзолдың алдағы тағдырын халық пен тиісті органдар шешеді. Бірақ түптің түбінде бұл ұлттық мұраны музейге өткізетінім анық», – деді Алагөзова.
Ол сөзінің бір бөлігін қазақ киносының символына айналған Меруерт Өтекешоваға арнап, актрисаға құрмет білдірді.
«Сіз – мәңгілік Қыз Жібексіз, қазақ қызының мәңгілік бейнесісіз. Құрметті Меруерт апай, сізге кішкентай сыйлығым ретінде тон табыстағым келеді. Сонымен қатар өз атымнан және жұбайымның атынан өмір бойы ай сайын 1 миллион теңге көлемінде алғыс төлемін тағайындағым келеді», – деді продюсер.
Еске салайық, бұған дейін Баян Алагөзованың қазақ киносы тарихындағы ерекше жәдігер – «Қыз Жібек» фильміндегі басты кейіпкердің қызғылт камзолын иеленгені белгілі болған еді. Кейін бұл мәселеге Қазақстан Мәдениет министрлігі де пікір білдірген.