RUS
SMARTNEWS.KZ басылымының хабарлауынша, Қазақстанда адам саудасына қарсы жүргізілген ауқымды «STOP трафик» операциясы барысында ондаған қылмыс әшкереленді. ІІМ мәліметінше, 2026 жылдың сәуір айында ел аумағында жүргізілген арнайы шара нәтижесінде адам саудасына қатысты 41 қылмыс тіркелген. Оның тоғызы кәмелетке толмағандарға қарсы жасалған.
ІІМ Ұйымдасқан қылмысқа қарсы күрес департаментінің өкілі Қуандық Алпыс бірнеше өңірдегі шулы фактілерді жария етті.
Қызылорда облысында полицейлер жаңа туған сәбиді сатуға қатысты схеманың жолын кесті. Тергеу мәліметінше, 25 жастағы әйел босанғанға дейін және кейін арнайы қоғамдық қорда тұрған. Кейін баладан бас тартқан соң, қор жетекшісі делдал ретінде әрекет етіп, сәбиді бір миллион теңгеге облыстың 50 жастағы тұрғынына беруді ұсынған. Күдіктілер уақытша ұстау изоляторына қамалды.
Ал Алматыда тұрақты мекенжайы жоқ адамдарды алдап, олардың атына несие рәсімдеген қылмыстық топқа қатысты тергеу басталды. Күдіктілер бірнеше қалада қымбат көліктер сатып алып, кейін қайта сатып отырған. Ұйымдастырушылар ұсталды.
Жетісу облысында 2005 және 2007 жылы туған екі жас құлдықтан босатылды. Тергеу нұсқасына сәйкес, оларды бір айға жуық күштеп ұстап, тұрмыстық химия өндіретін цехта жұмыс істеуге мәжбүрлеген. Зардап шеккендерге медициналық көмек көрсетілген.
Ең шулы оқиғалардың бірі Абай облысында анықталды. Полицейлер бірнеше қалада вебкам бизнесіне арналған порностудиялар желісін ұйымдастырған ерлі-зайыптыны ұстады. Тергеу мәліметінше, күдіктілер қыздарды өздері іздеп тауып, түсірілім орындарын дайындаған.
Сонымен қатар Астана, Алматы және бірқатар өңірде жастарды заңсыз әрекеттерге тартуға байланысты 20 қылмыстық іс қозғалды. Бұдан бөлек, ВИЧ инфекциясын қасақана жұқтыру бойынша 15 іс және порнография таратуға қатысты бес іс тергеліп жатыр.
Қазіргі уақытта барлық дерек бойынша сотқа дейінгі тергеу жалғасуда.