RUS
SMARTNEWS.KZ басылымының хабарлауынша, Алматының Түрксіб ауданында 81 жастағы зейнеткердің жоғалуы адам ұрлау дерегімен аяқталды. Қартты күдіктілер қала маңындағы ауылдардың біріне апарып, үйін өз аттарына рәсімдеуге көндірмек болған.
Тергеу мәліметінше, жалғыз тұратын қарияның жоғалғанын оның танысы полицияға хабарлаған. Әйел ер адамның ұзақ уақыт байланысқа шықпағанына алаңдап, құқық қорғау органдарынан көмек сұраған.
Жедел іздестіру барысында полицейлер зейнеткерді Алматы іргесіндегі елді мекендердің біріндегі тұрғын үйден тапты. Алдын ала мәлімет бойынша, күдіктілер қарияның сеніміне кіріп, оның дәрменсіз жағдайын пайдаланған.
— Күдіктілер жәбірленушінің сенімін теріс пайдаланып, оның еркіндігін шектеген. Олар қарияны жылжымайтын мүлкін өздеріне рәсімдеуге үгіттеген, — деп хабарлады полиция өкілдері.
Аталған іс бойынша екі ер адам мен бір әйел ұсталып, уақытша ұстау изоляторына қамалды. Қылмыстық кодекстің «Адам ұрлау» бабы бойынша іс қозғалды.
Қазір тергеу органдары оқиғаның барлық мән-жайын анықтап жатыр.