RUS
SMARTNEWS.KZ басылымының хабарлауынша, Алматыда қарқынды қозғалыс аймақтарында мотопатрульдер жол ережесін бұзушыларды анықтап, жауапкершілікке тарта бастады. Жаңа арнайы экипаждар жолдағы тәртіпті күшейту, жол-көлік оқиғаларын азайту және қала ішіндегі жағдайға жедел әрекет ету мақсатында құрылды.
Бұл мотопатрульдер Алматы қалалық әкімшілік полиция басқармасының арнайы батальоны құрамында жұмыс істейді.
Алматы қалалық әкімшілік полиция басқармасының бастығы Абдинур Тасыбаевтың айтуынша, негізгі міндет – жол қозғалысына қатысушылардың қауіпсіздігін қамтамасыз ету және құқық бұзушылықтардың алдын алу.
«Мотопатрульдік бөлімшелер бізге жолдағы ахуалға тез бейімделуге, бұзушылықтарды дер кезінде анықтап, тоқтатуға және жүргізушілер арасындағы тәртіп деңгейін арттыруға мүмкіндік береді», – деді ол.
Жаңа құрылым 30 мотоциклмен жабдықталған. Бұл әсіресе көлік тығыз жүретін учаскелерде жедел қозғалып, бұзушылықтарға жылдам әрекет етуге мүмкіндік береді.