RUS
SMARTNEWS.KZ басылымының хабарлауынша, Өскемен қаласында қызметтік міндетін атқарып жүрген жеке сот орындаушысына шабуыл жасау фактісі бойынша қылмыстық іс қозғалды. Оқиға 21 сәуір күні кешкі сағат 19:00 шамасында болған.
Тергеу деректеріне сәйкес, әйел алимент бойынша берешегі бар азаматтың мекенжайына жеке көлігімен барған. Сол сәтте белгісіз ер адам оған жақындап, алдымен көліктің дыбыстық сигналына наразылық білдірген. Кейін сот орындаушысы екенін білген соң агрессивті әрекетке көшкен.
Ер адам алдымен көлікке тас лақтырып, кейін әйелге дене жарақатын салып, оқиға орнынан қашып кеткен. Жедел-іздестіру шаралары нәтижесінде күдіктінің жеке басы анықталып, ол ұсталды. Белгілі болғандай, ол атқарушылық іс жүргізудің қатысушысы болып табылмайды.
Қазіргі уақытта күдіктіге қатысты Қазақстан Республикасы Қылмыстық кодексінің 293-бабы 1-бөлігі бойынша сотқа дейінгі тергеу жүргізілуде. Барлық қажетті тергеу амалдары атқарылып жатыр. Сондай-ақ сот-медициналық сараптама тағайындалған, ал көлікке келген материалдық шығын көлемі анықталуда.
Сараптама қорытындылары алынғаннан кейін іс материалдары сотқа жолданады. Тергеу процесі республикалық жеке сот орындаушылары палатасы басшылығының бақылауында.