RUS
SMARTNEWS.KZ басылымының хабарлауынша, Қазақстанда тегін және жеңілдікпен берілетін дәрі-дәрмектер тізіміне 23 жаңа препарат енгізу ұсынылды. Денсаулық сақтау министрлігі тиісті бұйрық жобасын қоғамдық талқылауға шығарды.
Құжат амбулаториялық деңгейде азаматтарды тегін және жеңілдікпен дәрі-дәрмекпен қамтамасыз ету жүйесін жаңартуға бағытталған. Жоба талқылауы 2026 жылдың 20 мамырына дейін жалғасады.
Министрлік түсіндірмесіне сәйкес, негізгі мақсат — науқастардың заманауи әрі тиімді емге қолжетімділігін арттыру және дәрілік қамтамасыз ету жүйесін халықаралық клиникалық стандарттарға сәйкестендіру.
Жаңартылған тізімге 16 түрлі ауру бойынша инновациялық 23 препарат енгізілмек. Атап айтқанда, созылмалы жүрек жеткіліксіздігіне шалдыққан балалар үшін «Ивабрадин» мен «Сакубитрил/Валсартан» комбинациясын қосу ұсынылған.
Ал бронх демікпесінің ауыр түрімен ауыратын пациенттерге «Омализумаб» препаратын беру жоспарланып отыр.
Сонымен бірге ювенильді артритке шалдыққан науқастарға арналған терапия да кеңейтіледі. Тізімге «Канакинумаб», «Тоцилизумаб», «Голимумаб» және «Адалимумаб» секілді заманауи дәрілер енгізілмек.
Бұйрық жобасында қазіргі емдеу стандарттарына сәйкес келмейтін ескірген бірқатар препараттарды алып тастау да қарастырылған.
Министрлік өкілдерінің мәліметінше, бұл шешім бюджет қаржысын тиімді жұмсауға және амбулаториялық дәрімен қамту сапасын арттыруға мүмкіндік береді.
Құжат Формулярлық комиссияның шешімдері негізінде әзірленген. Егер өзгерістер қабылданса, пациенттер халықаралық стандарттарға сай ем алу мүмкіндігіне ие болады.