RUS
SMARTNEWS.KZ басылымының хабарлауынша, қазақстандық интернет кеңістігінде жарық көрмеген «Мне стыдно» шоуының бір эпизодына қатысты қызу талқылау жүріп жатыр. Жоба әлі эфирге шықпағанымен, оның мазмұны әлеуметтік желіде үлкен резонанс тудырды.
Дауға себеп болған жазба Threads платформасында жарияланған. Онда комик Зарина Байболова түсірілім барысындағы жағдайды сипаттап, бағдарламаның қонағы рэпер De Lacure (шын аты — Ануар Баймұхаев) болғанын айтқан.
Шоудың форматы бойынша қатысушылар өз өміріндегі ыңғайсыз, ұятты оқиғаларды әңгімелейді. Алайда желіде тараған мәліметке қарағанда, бұл жолғы айтылған оқиға қарапайым «ұят жағдайдың» шегінен әлдеқайда ауыр сипат алған.
Жазбада келтірілген нұсқа бойынша, рэпер достарымен серуендеп жүрген кезде көмек сұраған әйелді байқайды. Оның айтуынша, олар әйелге көмектесуге кірісіп, жағдайын реттеуге тырысқан.
Ары қарай, талқылауларға сәйкес, достарының бірі басқаларын сыртқа шығарып жіберіп, көмекті өзі жалғастыратынын айтқан. Осыдан кейін желіде тараған пікірлерде әйелге қатысты ауыр құқық бұзушылық орын алғаны жөнінде болжам айтылады, ал сыртта қалғандар жағдайдың не болып жатқанын білген делінеді.
Осы тұс әлеуметтік желі қолданушыларының қатты реакциясын тудырды. Көпшілік мұндай әңгімені ойын-сауық форматындағы шоуда көрсетуге болмайтынын айтып, оқиғаның мазмұнына алаңдаушылық білдірді.
Пікір білдірушілердің бір бөлігі рэпердің өзіне және жобаның қатысушысы Зарина Байболоваға сын айтты. Олардың пікірінше, мұндай сипаттағы әңгімелерді жеңіл контент ретінде ұсыну дұрыс емес.
Сонымен қатар желіде бұл жағдайға құқық қорғау органдарының назар аудара ма деген сұрақ жиі көтерілуде.
Қазіргі таңда аталған оқиға бойынша ресми органдардан түсініктеме берілген жоқ. Сондай-ақ интернетте тараған мәліметтерге байланысты арыз түскені-түспегені де белгісіз күйінде қалып отыр.