RUS
SMARTNEWS.KZ басылымының хабарлауынша, Астанада жастар арасында болған жанжал соңы топтық соққыға ұласқан. Оқиға Конституция даңғылы маңында, «Ильяс» дүкені жанында тіркелген.
Жәбірленушінің туыстарының айтуынша, жас жігітке ондаған адам жабылған. Оның әпкесі Альбина Есимованың сөзінше, шабуыл жасағандардың саны шамамен 40 адамға жеткен.
Соққы салдарынан жасөспірім ауыр дене жарақатын алған: мұрны сынған, тісі зақымданған. Оған медициналық көмек көрсетілген.
Туыстары бұл істі жай қалдырмайтынын айтып, құқық қорғау органдарына ресми арыз дайындап жатқанын жеткізді. Олар толыққанды тергеу жүргізіліп, кінәлілердің заң алдында жауап беруін талап етіп отыр.
Сондай-ақ отбасы оқиғаның куәгерлеріне жүгініп, төбелестің мән-жайын анықтауға көмектесетін кез келген ақпаратты беруді сұрады.
Астана қалалық полиция департаменті оқиғаға қатысты ресми түсініктеме берді.
«Денсаулыққа қасақана ауыр зиян келтіру фактісі бойынша қылмыстық іс қозғалды. Іске қатысы бар тұлғалар анықталып, Сарыарқа ауданы полиция басқармасына жеткізілді. Белгілі болғандай, жастар арасында тұрғын үй ауласында жанжал туындаған.
Нәтижесінде кәмелетке толмаған азаматқа дене жарақаттары келтірілген. Оған медициналық көмек көрсетіліп, дәрігерлер тексерісінен кейін үйіне жіберілді. Қазір полиция қызметкерлері қажетті тергеу амалдарын жүргізіп, оқиғаның барлық мән-жайын анықтап жатыр», — делінген хабарламада.
Ведомство тергеу қорытындысы бойынша барлық қатысушылардың әрекетіне құқықтық баға берілетінін мәлімдеді.