RUS
Ақмола облысының Степногорск қаласында бірнеше мектеп оқушысы 1-сынып баласына күш көрсеткен оқиға қоғамда резонанс тудырды.
Желіде тараған ақпаратқа сәйкес, 5-сыныптың үш оқушысы бастауыш сыныптағы баланы жабылып ұрып кеткен. Оқиға 2 мамыр күні «Махаббат аллеясы» аумағында болған.
Жәбірленуші баланың анасының айтуынша, ұлы сол күні досымен бірге велосипед теуіп жүрген кезде бірнеше бала келіп тиіскен.
«Олар баламды тоқтатып, қорқыта бастаған. “Не істейміз? Телефоныңды аламыз ба, велосипедіңді аламыз ба, әлде артыңа ағаш тығамыз ба?” деп қоқан-лоқы көрсеткен. Кейін велосипедпен қуып жетіп, ұрып кеткен. Салдарынан ұлым басын жиектасқа соғып алды», — дейді анасы.
Оның сөзінше, келесі күні баланың басы мен аяғы ауырып, ауруханаға жеткізілген. Дәрігерлер тексеру жүргізген. Қазіргі уақытта баланың аяқтарында көгерген іздер бар, тізесі ауырады.
Оқиғаға байланысты Ақмола облыстық полиция департаменті тексеру басталғанын хабарлады.
«Аталған дерек бойынша тексеру жүргізілуде. Оқиғаға қатысы бар барлық тұлғалардың жеке басы анықталды. Тексеру қорытындысы бойынша процессуалдық шешім қабылданады», — деп мәлімдеді ведомство.