RUS
SMARTNEWS.KZ басылымының хабарлауынша, аңызға айналған «Қыз Жібек» фильміндегі камзолдың продюсер Баян Алагөзованың қолынан табылуы қоғамда қызу талқы туғызған еді. Осы жағдайға байланысты басты рөлді сомдаған актриса Меруерт Өтекешева алғаш рет пікір айтты.
Актриса бұл туралы журналист Майя Бекбаеваға берген сұхбатында айтты. Оның сөзінше, камзолды өзі де арада ұзақ жыл өткен соң алғаш рет әлеуметтік желідегі видеодан көрген.
«Бұл жағдай мен үшін де тосын болды. Бұрын киностудиядан сұрастырғанмын. Бірақ қайта құру кезеңінде көптеген костюм жоғалып кеткен еді», – деді актриса.
Меруерт Өтекешева қоғамда сынға ұшыраған Баян Алагөзованы да қорғап шықты. Оның айтуынша, шығармашылық адам мұндай тарихи дүниені көргенде эмоцияға берілуі заңды.
«Ол ешкімді ренжіткісі келмеген шығар. Бұл – ішкі қуаныштың көрінісі. Камзол сақталады. Болашақта музейге өткізілуі де мүмкін», – деді актриса.
Өтекешева тарихи киімнің жақсы сақталғанын атап өтті. Сондай-ақ ол «Қыз Жібек» фильміндегі костюмдердің ерекше сән-салтанатпен тігілгенін айтты. Оның сөзінше, табиғи терімен көмкерілген кейбір киімдер кейін басқа киноларда да пайдаланылған.
Айта кетейік, «Қыз Жібек» фильмінің қоюшы-суретшісі Гүлфайрус Ысмайылова болған.
Камзолға қатысты дау өршігеннен кейін Баян Алагөзова Меруерт Өтекешеваға өмір бойы ай сайын 1 миллион теңге төлейтінін мәлімдеді. Продюсер бұл шешім актрисаның қазақ өнеріне қосқан үлесіне құрмет ретінде қабылданғанын айтты. Сонымен қатар ол «Қазақ аруы» байқауын актрисаға арнап, сыйлық ретінде тон табыстауды жоспарлап отырғанын жеткізді.