RUS
SMARTNEWS.KZ басылымының хабарлауынша, Астанада өзін Ұлттық банк қызметкері ретінде таныстырған алаяқтар тұрғынды 21 миллион теңгесінен айырды. Ер адам қомақты қаржыны қолма-қол шешіп алып, оны қорапқа салып, курьер арқылы қаскөйлерге табыстаған.
Polisia.kz мәліметінше, полиция аса ірі көлемдегі алаяқтыққа күдікті 43 жастағы шетел азаматын ұстады.
Тергеу барысында күдіктінің жәбірленушіге телефон арқылы хабарласып, өзін Ұлттық банк қызметкері ретінде таныстырғаны анықталған. Ол белгісіз біреулер ер адамның депозиттік шотынан ақша аударуға әрекет жасап жатқанын айтқан.
Алаяқ сенімге кіріп, «қаражатты қорғау» сылтауымен алдымен бір миллион теңгені «қауіпсіз есепшотқа» аудартқан. Артынша жәбірленушіге өзін құқық қорғау органдарының қызметкерлері ретінде таныстырған басқа адамдар қоңырау шалып, «арнайы операцияның» жалғасып жатқанын жеткізген.
Олар ер адамның өзге жинақтары туралы мәлімет алып, тағы бір есепшотында ірі көлемдегі ақша жатқанын анықтаған. Кейін алаяқтар оны барлық қаржысын шешіп алып, «тексеру үшін» тапсыруға көндірген.
Сөйтіп астаналық 21 миллион теңгені қолма-қол ақшаға айналдырып, оны қорапқа салып, жеткізу қызметінің курьері арқылы берген. Кейін бұл қаражат бірнеше адам арқылы таратылып отырған.
Полиция қызметкерлері жедел іздестіру шаралары барысында ұрланған ақшаны түрлі есепшоттарға бөліп аударып жүрген шетел азаматын қолға түсірді. Қазір күдікті уақытша ұстау изоляторына қамалып, тергеу амалдары жүргізіліп жатыр.
Құқық қорғау органдары қазақстандықтарды сақ болуға шақырды. Полиция банк немесе құқық қорғау органдарының қызметкерлері ешқашан телефон арқылы ақша аударуды не қолма-қол қаржы беруді талап етпейтінін ескертті.