RUS
SMARTNEWS.KZ басылымының хабарлауынша, Алматыда компьютерлік клубтағы жаппай төбелестен кейін қаза тапқан 17 жастағы Дінмұхамед Есенгелді ісіне қатысты жаңа деректер жария болды. Марқұмның туыстары күдіктілер оны бірнеше ай бойы бопсалап келгенін айтып отыр.
Қайғылы оқиға 30 сәуірге қараған түні болған. Тергеу деректеріне сәйкес, жанжал компьютер клубында басталып, кейін көшеде жалғасып, жаппай төбелеске ұласқан. Сол сәтте екі жасөспірім пышақ жарақатын алып, ауруханаға жеткізілгенімен, олардың өмірін сақтап қалу мүмкін болмаған.
Дінмұхамедтің анасы ұлын ауыр күйде еске алып, оның бірнеше жерінен пышақталғанын айтып, бұл жағдайды ауыр қаза деп сипаттады. Ол баласының заңгер болуды армандағанын, оқуда озат болғанын және бос уақытында отбасына көмектесу үшін жұмыс істегенін жеткізді.
Әкесінің айтуынша, ұлы таңертең үйден жұмысқа шығып кеткен, алайда қайта оралмаған. Кейін оның мәйіті мәйітханадан табылған. Отбасы кінәлілердің әділ жазалануын талап етіп отыр.
Марқұмның әпкесі де оқиғаға дейін бірнеше ай бойы қысым болғанын мәлімдеді. Оның сөзінше, 20 жастағы күдікті Дінмұхамедтен тұрақты түрде ақша талап етіп, аптасына белгілі бір соманы беріп тұруға мәжбүрлеген. Жасөспірім бұл жағдайды отбасысына айтпай, өз бетімен шешуге тырысқан.
Төбелес кезінде Дінмұхамедтің жанында болған досы да күдіктілер қатарында. Оның әкесі ұлының жараланған адамға көмектесіп, жедел жәрдем шақырғанын, алайда қазір ол да уақытша ұстау изоляторында отырғанын айтты.
Әкесі оқиға барысын сипаттап, ұлының ауыр жағдайда болса да досына көмектесуге тырысқанын жеткізді. Оның айтуынша, жараланған жасөспірімге алғашқы көмек көрсетілген, бірақ алған жарақаттары тым ауыр болған.
Екінші қаза тапқан жасөспірім – 17 жастағы Ешім Қалдыбаев. Ол да сол түнгі төбелесте пышақ жарақатын алған. Қос марқұм бір-бірін бұрын танымайтыны айтылды.
Алматы қалалық полиция департаменті барлық қатысушылар анықталғанын хабарлады. Қазір олардың әрекеттеріне құқықтық баға беріліп жатыр.
Кісі өлтіру дерегі бойынша қылмыстық іс қозғалған. Тергеу нәтижесінде күдіктілерге 15 жылға дейін бас бостандығынан айыру жазасы қарастырылуы мүмкін.