RUS
SMARTNEWS.KZ басылымының хабарлауынша, Астанада әлеуметтік желілерде тараған «аудандарға бөлініп, адамдарға шабуыл жасалып жатыр» деген ақпаратты қалалық полиция жоққа шығарды.
Instagram желісіндегі Zhaloby.astana парақшасында жазба жарияланып, қалада кейбір топтар адамдарды тұрғылықты ауданына қарай бөліп, соққыға жығып жүргені туралы шағымдар айтылған. Жазбада куәгерлердің сөзінше, «ескі вокзал» мен «Арман» дүкені маңында жастар тобы өтіп бара жатқан адамдардан қай ауданнан екенін сұрап, белгілі бір аумақты атағандарға шабуыл жасағаны көрсетілген. Сондай-ақ кейбір жастар «Лесозавод» және «Чугунка» аудандарынан болуы мүмкін екені де айтылған.
Аталған ақпаратқа қатысты Астана қалалық полиция департаменті ресми түсініктеме берді.
Ведомство мәліметінше, тұрғын үй ауласында жастар арасындағы жанжал фактісі бойынша қылмыстық іс қозғалған. Оқиғаға қатысы бар барлық тұлғалар анықталып, Сарыарқа аудандық полиция басқармасына жеткізілген. Қазіргі таңда тергеу амалдары жүргізіліп, оқиғаның барлық мән-жайы анықталуда.
Полиция әлеуметтік желілерде тараған «қалада жаппай аудандық қақтығыстар болып жатыр» деген ақпарат шындыққа сәйкес келмейтінін мәлімдеді. Құқық қорғау органдарының айтуынша, елордадағы жағдай тұрақты және толық бақылауда.
Қалалық полиция тұрғындарды тек ресми ақпарат көздеріне сенуге шақырды.