Қостанай облысында қылмыстық іс қозғалған депутат мандатынан айырылды

SMARTNEWS.KZ басылымының хабарлауынша, Қостанай облысында Жангелдин аудандық мәслихатының депутаты Амангелді Қожахметовке қатысты қылмыстық іс қозғалуына байланысты оның депутаттық мандаты тоқтатылды. Бұл туралы «ТоболИнфо» жазды.

Басылым мәліметінше, іс субсидия қаражатын алу фактілеріне байланысты тергеліп жатыр.

Аудандық мәслихат төрайымы Анар Ержігітова жағдайға қатысты пікір білдіріп, депутаттың өкілеттігі тоқтатылғанын растады.

«Иә, ол аудандық мәслихат құрамынан шығарылды, енді бізде тоғыз депутат қалды», – деді ол.

Амангелді Қожахметов VII және VIII шақырылымдарда депутат болған.

Ресми мәліметтерге сәйкес, ол 1986 жылы 28 мамырда Қостанай облысы Жангелдин ауданы Сага ауылында дүниеге келген. Әр жылдары сот жүйесінде, әкімдік аппаратында және халыққа қызмет көрсету орталығында жұмыс істеген. 2015 жылдан бастап «Ұлпа» ауыл шаруашылығы кооперативін құрып, оны басқарған.