RUS
SMARTNEWS.KZ басылымының хабарлауынша, Қазақстанда исламдық экономиканы дамыту мақсатында шариғат кеңестерін құру ұсынылып отыр.
Қаржы нарығын реттеу және дамыту агенттігі (ҚНРДА) «Капитал нарығы туралы» заң жобасының консультациялық нұсқасын жариялады. Құжаттың бір бөлігі исламдық қаржы құралдарын дамытуға арналған. Реттеуші органның бағалауынша, Қазақстанда исламдық қаржы секторын кеңейтуге геоэкономикалық негіз бар.
Әңгіме исламдық бағалы қағаздарды шығару, арнайы қаржылық құрылымдарды құру және қаржы құралдарының ислам қағидаларына сәйкестігін растайтын тетіктерді енгізу туралы болып отыр.
Агенттік сукук шығару ережелерін нақтылауды, шариғат кеңестерін қалыптастыруды, арнайы қаржы компанияларының жұмысын реттеуді және мәмілелерді шариғат талаптарына сай сүйемелдеуді заңнамалық деңгейде бекітуді ұсынады.
Сукук исламдық облигациялардың баламасы ретінде қарастырылады. Алайда классикалық облигациялардан айырмашылығы — мұнда табыс пайыздық қарыздан емес, нақты активке, жобаға немесе ақша ағынына байланыстырылып құрылады.
Реттеуші органның пікірінше, исламдық қаржының дамуы халықаралық ислам қаржы орталықтарынан қосымша капитал тартуға мүмкіндік береді және институционалдық әрі жеке инвесторлар үшін жаңа қаржы құралдарын қалыптастырады.
Құжатта мысал ретінде Малайзия тәжірибесі келтірілген. Бұл елде исламдық қаржы құралдары капитал нарығы туралы негізгі заңнамаға енгізілген. Онда шариғат кеңестерінің құқықтық мәртебесі, арнайы қаржы компанияларының құрылымы және сукук үшін салықтық бейтараптық нақты бекітілген.
Бұған дейін агенттік исламдық қаржыдан бөлек цифрлық бағалы қағаздар шығару, секьюритизация, зейнетақы активтерін жеке басқару және туынды қаржы құралдарын дамыту бағыттарын да ұсынған еді.