RUS
SMARTNEWS.KZ басылымының хабарлауынша, Алматы қаласында Жеңіс күні қарсаңында Ұлы Отан соғысының ардагерлері мен оларға теңестірілген азаматтарға 50 мың теңгеден 5 миллион теңгеге дейін біржолғы әлеуметтік төлем берілді.
Әкімдік мәліметінше, биыл 9 мамыр қарсаңында 15 соғыс ардагерінің әрқайсысына 5 миллион теңгеден (10 мың доллар) төленген.
Сонымен қатар басқа санаттағы азаматтарға да материалдық көмек көрсетілген. Атап айтқанда, 1969 жылы Даман аралындағы және Жалаңашкөл маңындағы әскери қақтығыстарға қатысқан 17 адамға 200 мың теңгеден берілді.
Бұдан бөлек:
— ҰОС ардагерлеріне теңестірілген 1 353 адамға;
— басқа мемлекеттер аумағындағы әскери қимыл ардагерлері саналатын 2 955 азаматқа;
— соғыс жылдарындағы еңбегі үшін орден-медаль алған 4 713 тыл еңбеккеріне 100 мың теңгеден төленді.
Сондай-ақ қайтыс болған соғыс ардагерлерінің 191 жұбайына 50 мың теңгеден әлеуметтік көмек берілген.
Қала әкімдігі төлемдер Алматы мәслихаты бекіткен әлеуметтік көмек көрсету қағидаларына сәйкес жүргізілгенін мәлімдеді. Қаржы азаматтардың өтінішінсіз, «Азаматтарға арналған үкімет» мемлекеттік корпорациясы ұсынған тізім негізінде аударылған.
Айта кетейік, бұған дейін Астана қаласында да Жеңіс күніне орай 3 398 адамға 64 мың теңгеден 5 миллион теңгеге дейін біржолғы төлем берілгені хабарланған еді.