RUS
SMARTNEWS.KZ басылымының хабарлауынша, Павлодар облысында балық аулауға шығып, із-түзсіз жоғалған ер адамның денесі су арнасынан табылды. Бұл туралы өңірлік Төтенше жағдайлар департаменті хабарлады.
Ведомство мәліметінше, 3 мамыр күні Екібастұз қаласына қарасты Шиқылдақ ауылы маңындағы академик Сәтбаев атындағы канал аумағында 1963 жылы туған ер адамның жоғалғаны туралы хабар түскен.
Алдын ала дерек бойынша, ол 2 мамыр күні досымен бірге балық аулауға барған. Осыдан кейін байланысқа шықпаған.
Оқиға орнына Екібастұзда орналасқан жедел-құтқару жасағы жіберілді. Құтқарушылар арнайы техника мен моторлы қайықтың көмегімен су айдынын тексеріп, жағалау бойында іздеу жұмыстарын жүргізген. Сонымен қатар кинологиялық топ та жұмылдырылған.
Іздеу барысында резеңке қайық дрон арқылы әуеден бақылау кезінде анықталған. Кейін сүңгуірлер қайық маңындағы шамамен бес метр тереңдіктен ер адамның денесін тапқан.
ТЖД мәліметінше, марқұм құтқару кеудешесін кимеген. Оның денесі Екібастұз полициясына тапсырылды.