RUS
SMARTNEWS.KZ басылымының хабарлауынша, Шығыс Қазақстан облысы Шемонаиха ауданындағы Первомай кентінде өткен түні ауыр жол апаты болып, үш жас жігіт қаза тапты. Қайғылы оқиға туралы YK-news.kz хабарлады.
Жергілікті әкімдік бұл жағдайды ауыр трагедия деп атап, марқұмдардың отбасыларына көңіл айтты.
«Біздің кентте орны толмас қайғылы жағдай болды — үш жас жігіт көз жұмды. Ата-анасына, туған-туыстарына және осы қайғыны бөліскен барша жандарға шын жүректен көңіл айтамыз. Мұндай ауыр қазаны көтеруге сабыр мен күш тілейміз», – делінген Первомай кенті әкімдігі таратқан хабарламада.
Сонымен бірге әкімдік ата-аналарға арнайы үндеу жасап, көлік пен мотоцикл тізгіндейтін жастардың қауіпсіздігіне бейжай қарамауға шақырды.
«Балаларыңызбен жолдағы қауіпсіздік, жылдамдық режимін сақтау және мұқият болу туралы міндетті түрде сөйлесіңіздер», – деп ескертті жергілікті билік.
Шығыс Қазақстан облыстық полиция департаментінің мәліметінше, жас жігіттер жеңіл автокөлікпен жол апатына ұшыраған.
Қазіргі уақытта оқиғаның нақты себептері анықталып жатыр.