RUS
SMARTNEWS.KZ басылымының хабарлауынша, Қазақстандық теннисші Елена Рыбакина «Үлкен дулыға» турнирлеріне бойкот жариялау мәселесіне қатысты пікір білдірді. Әлемнің екінші ракеткасы ойыншылар жүлде қорының бөлінуіне наразы болса, ортақ шешімді қолдауға дайын екенін айтты.
Теннисші спортшылардың турнир табыстарынан алатын үлесі төңірегіндегі дауға тоқталып, ойыншылардың бірігуі қиын мәселе екенін жеткізді.
«Бұл — күрделі сұрақ. Бұған дейін де ойыншылар бірігіп, бойкот жариялауы мүмкін деген жағдайлар болған, бірақ ол ешқашан жүзеге аспады. Егер көпшілік “ойнамаймыз” деп шешсе, мен қолдаймын. Бұл мен үшін проблема емес», — деді Рыбакина.
Сонымен бірге ол мәселе тек сыйақы көлемінде емес екенін атап өтті. Оның айтуынша, спортшылар тапқан табыстың қомақты бөлігі салыққа кетеді.
«Көп адам үлкен салықтарды ескермейді. Көбірек табыс табуға болады, бірақ оның едәуір бөлігі салық ретінде ұсталады. Бұл — бөлек тақырып», — деді теннисші.
Бұған дейін әлемнің бірінші ракеткасы Арина Соболенко де «Үлкен дулыға» жарыстарындағы табыс бөлінісін сынап, ұйымдастырушылар ойыншылар талабына құлақ аспаса, бойкот болуы мүмкін екенін айтқан еді.
Талқылауға French Open турнирінің 2026 жылғы жүлде қорының ұлғаюы себеп болды. Алайда БАҚ мәліметінше, теннисшілерге бөлінетін үлес олардың күткенінен төмен болған.