RUS
Астанадағы Бейбітшілік және келісім сарайы ғимаратында Жеңіс күніне орай Астана қаласы әкімдігі Мәдениет басқармасының ұйымдастыруымен «Момышұлы Бауыржан» концерт-спектаклі өтті. Мәдени кеш қазақ халқының даңқты перзенті, әскери қолбасшы, жазушы әрі Екінші дүниежүзілік соғыс жылдарындағы ерліктің символына айналған Бауыржан Момышұлына арналды.
Қойылымға ардагерлер, әскери қызметкерлер, студенттер, зиялы қауым өкілдері және қала тұрғындары қатысты. Спектакльдің негізіне тарихи деректер, архивтік бейнематериалдар мен соғыс жылдарындағы баспасөз жарияланымдары арқау болды. Театрландырылған көріністер арқылы көрерменге Бауыржан Момышұлының майдан жолы, мінезі, сарбаздарға деген көзқарасы және Отанға адалдығы көрсетілді.
Концерт-спектакль жанды музыка, хореография және заманауи мультимедиялық шешімдермен толықтырылды. Сахнада соғыс жылдарындағы әндер, елге, туған жерге және майдандас достыққа арналған композициялар орындалды. Қойылым авторлары майданға аттанған мыңдаған қазақстандық сарбаздардың тағдырына да ерекше назар аударды.
Басты рөлдерді Қуандық Қыстықбаев, Бақыт Қажыбек, Асылхан Төлепов және Данияр Оразаев сомдады. Сонымен қатар, кеште Айгүл Қосанова, Жанғали Жүзбай, Бауыржан Исаев, Клара Төленбаева, Медет Салықов, Алтынай Жорабаева, Гүлсім Мырзабекова, Дәурен Төлеубаев, Хамит Отарбаев, Нұрсат Алмас, Өзгеріс Шерікбай, Ұлттық әскери-патриоттық орталығының «Жас сарбаз» балалар өнер студиясының хоры және Art4man тобы өнер көрсетті.
Мәдени шара көрерменнің ұзақ қол шапалағымен аяқталып, 9 мамырға арналған елордадағы маңызды мәдени бағдарламалардың біріне айналды.