RUS
SMARTNEWS.KZ басылымының хабарлауынша, Астанада «Бәйтерек» монументінің маңында әдепсіз сипаттағы фото түсіріп, оны әлеуметтік желіге жариялаған студент бес тәулікке әкімшілік қамауға алынды.
Елорда сотының мәліметінше, құқық бұзушылық әлеуметтік желілерге жүргізілген мониторинг кезінде анықталған. 20 жастағы студент қаладағы басты нысандардың бірі саналатын «Бәйтерек» жанында қоғамға жат қылық көрсетіп, суретті интернетке жүктеген.
Іс материалдарында оның әрекеті «Бәйтерек» монументін пайдалана отырып, әдепсіз визуалды ишара жасау» ретінде сипатталған. Сот мұны қоғамға ашық құрметсіздік таныту және қоғамдық тәртіп нормаларын бұзу деп бағалады.
Сот отырысында студент кінәсін толық мойындап, жасаған ісіне өкінетінін айтқан. Құқық бұзушылық фотоматериалдар мен басқа да дәлелдер арқылы расталған.
Сот әкімшілік жаза тағайындау кезінде құқық бұзушылықтың сипатын, оның қоғамға теріс әсерін, сондай-ақ студенттің жасын және әлеуметтік мәртебесін ескерген.
Сот қаулысымен ол ұсақ бұзақылық жасағаны үшін кінәлі деп танылып, бес тәулікке әкімшілік қамауға алынды. Қаулы әзірге заңды күшіне енген жоқ.