RUS
SMARTNEWS.KZ басылымының хабарлауынша, Өзбекстанның Наманган облысы аумағында 11-сынып оқушысының қазасымен аяқталған ауыр қылмыс қоғамды дүр сілкіндірді. Қайғылы оқиға Касансай ауданында тіркелген.
Өзбекстан Бас прокуратурасының мәліметінше, 18 жастағы мектеп оқушысы мен оның 28 жастағы жігіті арасында мектеп бітіру кешіне арналған көйлекке байланысты жанжал шыққан. Талас 6 мамыр күні таңертең басталған.
Даудың соңы ауыр қылмысқа ұласқан: ер адам қызға бірнеше рет пышақ сұғып, ол кеуде және іш тұсынан ауыр жарақат алған. Қылмыстан кейін күдікті оқиға орнынан қашып кеткен.
Жарақат алған оқушы ауруханаға жеткізілгенімен, дәрігерлер оның өмірін сақтап қала алмады. Күдікті көп ұзамай ұсталып, оған «қасақана кісі өлтіру» бабы бойынша қылмыстық іс қозғалды.
Оқиға әлеуметтік желілерде үлкен резонанс тудырып, елде әйелдер мен жас қыздарға қатысты зорлық мәселесін қайта күн тәртібіне шығарды.