RUS
Университет ректоры Саламат Идрисовтың айтуынша, 2012 жылдан бері оқу орнында әзербайжан халқының тарихы мен мәдениетін зерттеу орталығы жұмыс істейді.
«Бұл орталықты ашудағы мақсат – бауырлас елдер арасындағы ынтымақтастық пен рухани байланысты нығайту. Сол жылдан бері университеттің үздік студенттеріне Әзербайжан Республикасының бірінші президенті Гейдар Әлиев атындағы халықаралық стипендия беріліп келеді», -дейді Саламат Идрисов.
Биылғы халықаралық стипендияға оқуда және қоғамдық жұмыста үздік деп танылған 5 студент ие болды.
Олар – физика, математика және ақпараттық технологиялар факультетінің студенті Жансезім Қуандықова, көптілді білім беру факультетінің студенті Ерлан Баймұханов, гуманитарлық ғылымдар және өнер факультетінің студенті Геогорий Шапошников, жаратылыстану және ауылшаруашылық факультетінің студенті Әсел Аюпова және инновациялық білім беру факультетінің студенті Санжар Темірболатов.
Атыраулық студенттерге стипендияны тапсыру іс-шарасына Әзербайжан Республикасының Ақтау қаласындағы бас консулдығының басшысы Эльчин Мамедов пен мәдениет және білім жөніндегі кеңесші Илкин Оруджов қатысты.
«Биыл Әзербайжан Республикасының тәуелсіздігін нығайтып, экономикасын өркендетуге, бауырлас және өзге мемлекеттермен әріптестік байланысын өрістетуге үлес қосқан Гейдар Әлиевтің туғанына 100 жыл толады. Осыған орай Атырау университетінің студенттері арасында шығармашылық конкурс өтіп, үздік студенттерге халықаралық стипендия беріліп отыр. Бұл – бауырлас елдер арасындағы берік байланыстың дәлелі», -дейді Эльчин Мамедов.