RUS
SMARTNEWS.KZ басылымының хабарлауынша, Абай облысында 2015 жылы Ресей аумағында жасалған аса ауыр қылмыс бойынша ұзаққа созылған тергеу аяқталды. Қылмысқа қатысы бар барлық тұлғалар анықталып, іс сотқа жолданды.
Іс материалдарына сәйкес, төрт адамнан құралған топ қымбат автокөлік сатып алмақшы болып, көлік иесін әдейі кездесуге шақырған. Жол үстінде күдіктілер ер адамға шабуыл жасап, оған бірнеше рет пышақ жарақатын салған. Кейін оны көлікпен басып өткен. Жәбірленуші оқиға орнында қаза тапқан.
Осыдан кейін қылмыскерлер көлікті иемденіп, ізін суытқан.
Абай облысы полиция департаментінің мәліметінше, қылмыс жасалғанына тоғыз жыл өтсе де, тергеу жұмыстары тоқтатылмаған. Іс Қазақстан мен Ресей құқық қорғау органдарының бірлескен әрекетімен жүргізілген.
Тергеу барысында куәлар мен күдіктілерден жауап алынып, хат-хабарлар, бейнебақылау жазбалары зерттелген. Сондай-ақ халықаралық сұраулар жолданып, қосымша дәлелдер жинақталған. Нәтижесінде қылмыстық топтың соңғы мүшесінің жүрген жері анықталған. Ол халықаралық іздеуде болып, 2024 жылы Алматы қаласында ұсталды.
Бұған дейін топтың үш мүшесі жазасын алған: біреуі Ресей Федерациясында (Барнаулда), екеуі Шығыс Қазақстан облысында сотталған.
Сот үкімімен соңғы айыпталушы кісі өлтіру және қарақшылық баптары бойынша кінәлі деп танылып, 17 жылға бас бостандығынан айырылды.
Полиция департаменті мұндай істерде ескіру мерзіміне қарамастан, барлық қылмыстың толық ашылып, кінәлілердің жауапқа тартылатынын атап өтті.