RUS
SMARTNEWS.KZ басылымының хабарлауынша, 2026 жылдың алғашқы үш айында Қазақстанға Қытайдан тұрақты тұруға көшіп келушілер саны бірнеше есе өсті. Бұл туралы Data Hub Ұлттық статистика бюросының деректеріне сүйене отырып хабарлады.
Қаңтар-наурыз аралығында Қазақстанға Қытайдан 1 260 адам қоныс аударған. Бұл өткен жылдың осы кезеңімен салыстырғанда үш еседен астам көп көрсеткіш.
Сарапшылардың мәліметінше, мұндай жоғары көші-қон көрсеткіші кемінде соңғы тоғыз жыл ішінде алғаш рет тіркеліп отыр. Алайда тоқсандық статистикада құбылмалылық жиі кездеседі. Яғни белгілі бір кезеңдегі күрт өсім кейін төмендеумен алмасуы мүмкін.
Соған қарамастан, соңғы екі жылдағы көрсеткіштер Қытай азаматтарының Қазақстанға қоныс аударуға деген қызығушылығы тұрақты түрде артып келе жатқанын аңғартады. Мәселен, өткен жылы да Қытайдан келгендер саны бірден 98 адамнан 750 адамға дейін көбейген болатын.
Биылғы бірінші тоқсанның қорытындысы бойынша Қытай Қазақстанға көшіп келушілер саны жағынан үшінші орынға шықты. Екінші орында тұрған Ресейден айырмашылық небәрі бес адамды құрады. Ресейден 1 265 адам келген, бұл өткен жылмен салыстырғанда 29 пайызға жоғары.
Ал көш басында Өзбекстан тұр. Бұл елден Қазақстанға 2 275 адам қоныс аударған. Дегенмен бұл бағыттағы көрсеткіш, керісінше, 13 пайызға төмендеген.
Статистикаға сәйкес, Қытайдан келгендердің басым бөлігі – этникалық қазақтар. Олардың үлесі 99,5 пайызға жетеді.
Қоныс аударушылар ең көп таңдаған өңірлер қатарында Астана мен Алматы қалалары, сондай-ақ Алматы және Жетісу облыстары аталды.
Иммиграциялық статистикаға тұрақты тұратын елін ресми түрде ауыстырған шетел азаматтары мен азаматтығы жоқ адамдар енгізілген.