RUS
SMARTNEWS.KZ басылымының хабарлауынша, Мәжіліс депутаты Дәулет Мұқаев жұбайын парламент атынан құттықтағаны үшін туындаған қоғамдық сынға пікір білдірді. Оның айтуынша, бұл әрекеттің астарында әйелге құрмет көрсету мәдениетін дәріптеу ниеті жатыр.
Депутаттың сөзінше, қазіргі қоғамда әйелдерге қатысты зорлық-зомбылық мәселесі жиі көтеріліп жатқандықтан, ер азаматтар жақын жандарын тірісінде қадірлеп, құрметін ашық көрсетуі керек.
«Басты мақсат – барымызды бағалай білу, қадірлеу, тірісінде құрметтеу. Қазір әйелдерге түрлі зорлық-зомбылықтар жасалып жатыр. Ер азаматтар әйелдерді құрметтеп, сол құрметін көрсетіп жүрсе деген ой болды», – деді ол.
Журналистің «Құттықтаудың басқа жолы болмады ма?» деген сұрағына депутат мұнда ешқандай ерсілік көрмейтінін айтты.
«Сіз солай қабылдауыңыз мүмкін. Бірақ менің және көп адамның көзқарасы бойынша мұнда оғаш ештеңе жоқ», – деді Мұқаев.
Бұған дейін әлеуметтік желіде депутаттың жұбайы Лаураға парламент атынан ресми құттықтау жасаған видеосы кең тараған еді. Дәулет Мұқаевтың айтуынша, мұндай құттықтаулар ақылы түрде рәсімделеді.
«Парламенттегі ресми құттықтауларды өзіміз сатып аламыз. Бір қағазы 5 мың теңге тұрады. Лаура 30 жасқа толғанда осындай құттықтау алғысы келетінін айтқан. Содан бері “гештальты” жабылмай жүрді. Биыл 32 жасқа толып жатыр. Парламент 1 шілдеде тарауы мүмкін болған соң, қолымда мүмкіндік тұрғанда жасап бердім», – деді депутат.
Кейін ол әлеуметтік желіде жұбайына арнаған жеке жазбасын жариялап, 11 жылдық отбасылық өмірі туралы әсерлі пікір қалдырған.
Алайда бұл жағдай қоғамда екіұдай пікір туғызды. Бір топ қолданушы мұны ерлі-зайыптылар арасындағы жылы әзіл мен романтикалық қадам ретінде қабылдаса, енді бірі мемлекеттік мәртебесі бар атрибуттарды жеке мақсатқа пайдалану қаншалықты орынды деген мәселе көтерді.
Әлеуметтік желілерде депутаттың бұрынғы қызметі мен қоғамдық рөліне қатысты да сын айтылды. Кейбір пікір иелері оның «декретке миллионмен» курстары мен табысы төңірегіндегі бұрынғы мәлімдемелерін еске алған.
Сондай-ақ оқырмандардың бір бөлігі депутаттардың ресми мінбер мен мемлекеттік ресурстарды жеке құттықтауларға қолдануы қоғамда жиі талқыланып келе жатқанын атап өтті.
Еске салсақ, бұған дейін Ардақ Назаров та Мәжіліс отырысында сөзін анасын туған күнімен құттықтаудан бастағаны үшін сынға ұшыраған болатын.