RUS
SMARTNEWS.KZ басылымының хабарлауынша, Қасым-Жомарт Тоқаев Режеп Тайып Ердоған Астана әуежайында жеке қарсы алды. Түркия басшысының Қазақстанға сапары аясында елордада салтанатты қарсы алу рәсімі өтті.
Ақорда мәліметінше, Түркия президентінің ұшағы Қазақстан шекарасынан бастап Астана әуежайына дейін Қазақстан Әуе қорғанысы күштерінің жойғыш ұшақтарының сүйемелдеуімен жеткізілген.
Әуежайда ұшақ трапының маңына құрмет қарауылы сап түзеген. Түркия делегациясын алғашқы болып Қасым-Жомарт Тоқаев қарсы алды.
Сондай-ақ түрік көшбасшысын Қазақстан мен Түркия тулары ұсталған балалар қарсы алып, екі тілде «Ata yurda hoş geldiniz!» және «Атажұртқа қош келдіңіз!» деп сәлемдесті.
Одан кейін әуежай аспанында Қазақстан және Түркия туларын алып ұшқан тікұшақтар көрініс көрсетті. Ал терминал ішінде жас музыканттар Ердоғанның құрметіне «Домбыра» композициясын орындады.
Режеп Тайып Ердоған Қазақстанға Қасым-Жомарт Тоқаевтың шақыруымен келді. 13-14 мамыр аралығында өтетін сапар барысында тараптар қазақ-түрік стратегиялық серіктестігін, сауда-экономикалық және саяси байланыстарды талқылайды.
Сонымен қатар Астанада Қазақстан мен Түркия арасындағы Жоғары деңгейдегі стратегиялық ынтымақтастық кеңесінің алтыншы отырысы өтеді.