RUS
SMARTNEWS.KZ басылымының хабарлауынша, Қазақстанда ресейлік қыздың видеосы қызу талқыға түсті. Алматыға келген азаматша ЖСН мен банк картасын рәсімдеу кезіндегі бюрократияға шағымданып, әлеуметтік желіде даулы мәлімдеме жасады.
Threads желісінде жарияланған видеода ол бірнеше күн бойы ХҚКО мен банк арасында сабылғанын айтып, Қазақстандағы қызмет көрсету жүйесін сынға алған. Оның сөзінше, жеке сәйкестендіру нөмірінсіз банк шотын да, картаны да жылдам ашу мүмкін болмаған.
Алайда желідегі басты реакцияны бюрократия емес, қыздың айтқан сөзі тудырды. Видеода ол балағат сөздер қолданып, «Ресейдегі өзбектей сезініп тұрмын» деп мәлімдеген.
Бұл тіркес көпшіліктің ашуын туғызды. Қазақстандық қолданушылар мұны еңбек мигранттарына және өзге ұлт өкілдеріне қатысты менсінбеушілік ретінде қабылдады. Пікір жазғандар шетел азаматтарына ЖСН рәсімдеу — қалыпты заңды талап екенін, онсыз елде банк және мемлекеттік қызметтердің көбі көрсетілмейтінін еске салды.
Кейбір желі қолданушылары қыздың ашуға бой алдырғанын түсінуге болатынын айтқанымен, басым көпшілік оның сөйлеу мәнерін орынсыз деп бағалады. Комментарийлерде «банк қызметін Ресейден алсын», «мұндай сөздерге құқықтық баға берілуі керек» деген пікірлер де жазылған.
Сонымен қатар бірқатар қазақстандық бұл жағдай мигранттарға қатысты қалыптасқан стереотиптер мәселесін де ашып берді деп есептейді. Олардың айтуынша, видеодағы сөздер Ресейдегі еңбек мигранттарына жиі көрсетілетін менсінбеушілік көзқарастың көрінісін байқатады.