RUS
SMARTNEWS.KZ басылымының хабарлауынша, ауыр дертпен күресіп жүрген 31 жастағы Александрдың өмірі күтпеген жерден өзгерді. Бетперде киген қайырымды жан оған пәтер сыйлап, емделуіне қаржылай көмек көрсетті.
Александр церебралды сал ауруына шалдыққан. Бұдан бөлек, оның аяғында ақау бар, қалқанша безінің қатерлі ісігі анықталған және көру қабілеті де нашарлаған. Соған қарамастан ол өмірден түңілмей, еңбек етіп келеді.
Ер адам бесінші қабаттағы жалдамалы бөлмеде жалғыз тұрғанын айтады. Күндіз инженер-бағдарламашы болып жұмыс істесе, кешке курьер болып табыс табады.
«Курьер болып жүргенімде кей адамдар күледі. Әрине, бұл маған ауыр тиеді. Бірақ кейде мүгедектігіме де шүкір деймін. Мүмкін, тағдыр мені осылай бір нәрседен қорғап жүрген шығар», – дейді Александр.
Ол туғаннан кейін әкесінің өзін тастап кеткенін, ал анасы ішімдікке салынып кеткенін де жасырмады.
«Анам да дені сау бала күтті ғой. Ал мен мүгедек болып тудым. Кейде анамның ішімдікке салынуына өзімді кінәлаймын. Кәдімгі ұл сияқты анаммен қыдырғым келеді. Қолға көтеріп, арқалап жүргім келеді. Бірақ оған шамам жоқ», – дейді ол.
Александрдың оқиғасы әлеуметтік желіде кең тарағаннан кейін «Бетперде киген адам» атанып кеткен меценат оған баспана алып беріп, емделуіне қаражат бөлген.
Желі қолданушылары бұл оқиғаға бейжай қарамай, Александрдың өмірге деген жігеріне тәнті болғандарын жазуда.