RUS
SMARTNEWS.KZ басылымының хабарлауынша, Алматыда әлеуметтік желідегі даулы видеодан кейін Ресей азаматшасы 10 тәулікке қамауға алынды. Ол Қазақстанға банк картасын рәсімдеу үшін келгенін айтқан.
Видео әлеуметтік желілерде кең таралып, қоғамда қызу талқыға түсті. Жазбада шетелдік азаматша банк пен ХҚКО арасындағы ұзақ бюрократиялық процестерге шағымданған. Оның айтуынша, бірнеше күн бойы құжат рәсімдеу үшін мекемелер арасында жүруге мәжбүр болған.
Желі қолданушыларының ерекше назарын әйелдің «Өзімді Ресейдегі өзбек сияқты сезіндім» деген сөзі аударған. Көпшілік бұл пікірді менсінбеушілік әрі этностық астары бар орынсыз салыстыру ретінде қабылдады. Ал кейбір қолданушылар оның эмоцияға беріліп сөйлегенін айтқан.
Алматы қалалық полиция департаменті аталған видеоға байланысты тексеру жүргізілгенін хабарлады. Ведомство мәліметінше, шетелдік азаматша қоғамдық орында балағат сөздер айтып, қоғамдық тәртіпті бұзған.
Полиция өкілдері заң талаптары азаматтығына қарамастан баршаға бірдей қолданылатынын атап өтті. Осы факті бойынша ұсақ бұзақылық бабы негізінде әкімшілік іс қозғалып, материалдар сотқа жолданған.
Алматының мамандандырылған ауданаралық әкімшілік сотының шешімімен құқық бұзушы 10 тәулікке әкімшілік қамауға алынған.
Құқық қорғау органдары қоғамдық орындарда әдеп нормаларын сақтау мен дөрекі мінез-құлыққа жол бермеу барлық азамат үшін міндетті екенін ескертті.