«Есі дұрыс емес»: Шымкентте әйелді емханада өлтірген ер адам түрмеден босатылды
Қанды оқиға биыл қаңтарда емханадан шыққан әйелге жасалған шабуылдан кейін болған еді.
SMARTNEWS.KZ басылымының хабарлауынша, Шымкентте емхана маңында әйелді өлтірді деп айыпталған ер адам қылмыстық жауапкершіліктен босатылды. Сот оны есі дұрыс емес деп танып, психиатриялық стационарға мәжбүрлі емдеуге жіберу туралы шешім шығарды.
Сот материалдарына сәйкес, кешенді психологиялық-психиатриялық сараптама күдіктінің қылмыс жасаған сәтте өз әрекетін толық түсінбегенін көрсеткен. Мамандар оған параноидты синдроммен асқынған ауыр формадағы параноидты шизофрения диагнозын қойған.
Судья Бақытжан Туналиев сот отырысында күдіктінің қоғамдық қауіпті әрекеттерінің мәнін түсінуге қабілетсіз болғанын мәлімдеді. Осыған байланысты оған қатаң бақылаудағы арнайы психиатриялық мекемеде мәжбүрлі ем тағайындалған. Емдеу мерзімі шектелмеген.
Тергеу мәліметінше, қылмыс биыл қаңтар айында болған. Күндіз емханадан қайтып келе жатқан әйелге бейтаныс ер адам көшеде шабуыл жасаған. Күдікті асүй пышағымен әйелдің өмірлік маңызды тұстарына бірнеше рет соққы жасаған. Зардап шегуші жедел жәрдем жеткенге дейін көп қан жоғалтудан көз жұмған.
Полиция күдіктіні бірден ұстай алмаған. Ол қарсылық көрсетіп, оқиға орнынан қашуға тырысқан. Ұстау кезінде тәртіп сақшылары оған оқ атуға мәжбүр болған.
Кейін анықталғандай, бұл адам бұған дейін терроризмді насихаттады деген айыппен сотталған.
Материал авторы
