LRT-да көзіне жас алған қария бұрынғы жолсерік болып шықты (ВИДЕО)
LRT-да терезеге қарап толқыған қарияның өмірбаяны әлеуметтік желіні баурап алды.
SMARTNEWS.KZ басылымының хабарлауынша, Астана LRT ішінде көзіне жас алған қарияның видеосы әлеуметтік желілерде үлкен резонанс тудырды. Кейін оның бұлай толқуы кездейсоқ емес екені белгілі болды – ол бұрын теміржол саласында жұмыс істеген тәжірибелі маман.
Желіде тараған видеода егде жастағы ер адамның жаңа LRT пойызымен алғаш рет жүріп өтіп, қатты толқып, көзіне жас алған сәті түсірілген. Бұл кадрлар Threads платформасында тез таралып, қолданушылардың жылы пікіріне ие болды. Көпшілік оның шынайы эмоциясын атап өтіп, мұны ұзақ күткен жобамен байланыстырған.
Алайда кейінірек қарияның қызы әлеуметтік желіде түсініктеме беріп, оның реакциясының себебін ашты. Оның айтуынша, әкесі ұзақ жылдар бойы жолсерік болып қызмет атқарған.
«Әкем бұрын Астана – Ташкент, Арқалық бағыттарында жолсерік болған. Сондықтан ол үшін пойыз – жай көлік емес, өмірінің бір бөлігі», – деп жазды ол.
Осылайша, қарияның эмоциясы кездейсоқ емес екені белгілі болды. Пойызбен байланысты еңбек жолы оның жаңа көлік түрін ерекше сезіммен қабылдауына себеп болған.
Сонымен қатар, бұған дейін желіде қариямен туыстығын мәлімдеп, видеоны өшіруді сұраған қолданушы да болған. Алайда оның сөзі ресми түрде расталмаған, ал желі қолданушылары бұл мәлімдемеге күмәнмен қараған.
Материал авторы
