Оралда жеті ит бес жастағы баланы талап тастай жаздады
Анасының айтуынша, баланың денесінде сау жер қалмаған, дәрігерлер оған сегіз тігіс салып, шұғыл екпе жасаған.
SMARTNEWS.KZ басылымының хабарлауынша, Орал қаласында бес жасар бала қаңғыбас иттердің шабуылынан ауыр жарақат алып, ауруханаға түсті. Оны ашулы иттердің ортасынан кездейсоқ куәгер әрең құтқарып қалған.
Оқиға 17 мамыр күні кешке тұрғын үйлердің бірінің ауласында болған. Алайда оның мән-жайы енді ғана белгілі болып отыр.
Зардап шеккен баланың анасы Назгүл Сандыбаеваның айтуынша, ұлы балалар алаңында ойнап жүрген кезде оған кенеттен жеті бірдей ірі ит тап берген.
Әйелдің сөзінше, баланың саны қатты тістеліп, арқасы жыртылған, қолы мен саусақтары жараланған. Қазір оның денесінің көп бөлігінде жарақат бар.
Анасының айтуынша, дәл сол сәтте көршілерінің бірі баланың айқайын естіп, иттерді қуып жіберген. Кейін ол жараланған баланы ата-анасына жеткізіп берген.
Бала дереу ауруханаға жеткізіліп, дәрігерлер оған сегіз тігіс салып, қажетті екпелер жасаған. Қазір ол дәрігерлердің бақылауында жатыр. Дәрігерлер оның жағдайын тұрақты деп бағалап отыр.
Батыс Қазақстан облыстық денсаулық сақтау басқармасы әзірге баланың жағдайына қатысты ресми түсініктеме берген жоқ.
Ал анасы жергілікті биліктен шұғыл әрі қатаң шара қабылдауды талап етуде. Оның айтуынша, аулада қаңғыбас иттердің адамдарға шабуыл жасауы бірінші рет емес.
Орал қаласының әкімдігі бұл мәселеге қатысты түсініктеме беріп, қараусыз жануарлардың санын реттеу жұмыстары қолданыстағы заң аясында жүргізіліп жатқанын мәлімдеді.
Материал авторы
