Air Astana төңірегінде жаңа дау шықты: Қызметкер жолаушының жеке деректерін таратқан болуы мүмкін
Air Astana қызметкері жолаушы мен оның туыстарының барлық әуе сапарлары туралы мәліметті сотқа ұсынған.
SMARTNEWS.KZ басылымының хабарлауынша, Шымкенттегі соттардың бірінде қаралған азаматтық іс күтпеген дауға ұласты. Қаржылық дауға байланысты өткен процесс барысында Air Astana әуе компаниясының қызметкері жолаушы мен оның туыстарының барлық әуе сапарлары туралы мәліметті сотқа ұсынған. Бұл туралы журналист Михаил Козачков өзінің Telegram арнасында жазды.
Сот материалдарына сәйкес, талапкер қарсы тараптың материалдық жағдайын дәлелдеу үшін оның және отбасы мүшелерінің ұшу бағыттары мен сапар деректерін іске тіркеуді сұраған.
Мәселенің басты дауы — бұл ақпараттың қалай алынғанында. Журналистің жазуынша, бұған дейін талапкердің адвокаты әуе компаниясына ресми сауал жолдап, нақты адамның сапарлары туралы толық мәлімет сұратқан. Алайда Air Astana заңгерге мұндай ақпаратты беруден бас тартқан.
Соған қарамастан, әуе компаниясының қызметкері әлдебір жолмен жолаушының ұшу деректеріне қол жеткізіп, кейін оларды сотқа тапсырған.
Сот ақырында талап арызды қанағаттандырмай, Шымкент қаласының прокурорына жекеше ұйғарым жолдады. Құжатта талапкер әрекетінде жеке деректерге қатысты мәліметтерді заңсыз жинау және тарату белгілері бар-жоғы тексерілуі тиіс екені көрсетілген.
Қазақстан Қылмыстық кодексінің 147-бабында жеке өмірге қолсұғушылық және дербес деректер туралы заңнаманы қызметтік жағдайын пайдаланып бұзу бес жылға дейін бас бостандығынан айырумен жазалануы мүмкін екені жазылған.
Енді Шымкент прокуратурасы әуе компаниясы қызметкерінің әрекеті заң бұзушылық болып санала ма, жоқ па — соны анықтауы тиіс.
Материал авторы
