Атырау облысында ірі жол апаты болып, төрт адам қаза тапты
Таңда Hyundai Sonata аударылып, төрт адам көз жұмды.
SMARTNEWS.KZ басылымының хабарлауынша, Атырау облыстық полиция департаментінің мәліметінше, қайғылы оқиға 29 мамыр күні таңғы сағат 06:30 шамасында Индер ауданы аумағындағы Индер – Қарабау тасжолының 15-шақырымында болған.
Алдын ала дерек бойынша, Hyundai Sonata көлігінің жүргізушісі рөлге ие бола алмай, көлік аударылып кеткен.
Жол апаты салдарынан 41 жастағы жүргізуші мен үш жолаушы оқиға орнында көз жұмды. Тағы бір жолаушы түрлі дене жарақатымен аудандық ауруханаға жеткізілген.
Қазір аталған дерек бойынша сотқа дейінгі тергеу амалдары жүргізіліп жатыр. Полицейлер қажетті материалдарды жинақтағанын хабарлады.
Атырау облыстық полиция департаменті жүргізушілерді жол қозғалысы ережелерін қатаң сақтауға шақырды.
Ведомство өкілдері әсіресе қалааралық трассаларда жылдамдықты асырмау, шаршаған күйде көлік тізгініне отырмау және жол мен ауа райы жағдайын ескерудің маңызын атап өтті.
«Жолдағы қауіпсіздік әрбір жүргізушінің жауапкершілігіне тікелей байланысты», — деп мәлімдеді полиция.
Материал авторы
