Зеленский дабыл қақты: Ресей жаңа жаппай шабуылға дайындалып жатыр
Киев облысына жасалған соңғы жаппай шабуылдан кейін Украинада қауіпсіздік шаралары күшейтілді.
SMARTNEWS.KZ басылымының хабарлауынша, Украина президенті Владимир Зеленский Ресей жақын арада ел аумағына тағы бір ірі соққы жасауы мүмкін екенін айтты.
Оның сөзінше, Украина барлау қызметтерінің қолында Ресейдің жаңа көлемді шабуылға әзірленіп жатқаны туралы мәліметтер бар. Осыған байланысты Зеленский тұрғындарды әуе дабылы туралы ескертулерге мұқият болып, қауіпсіздік шараларын сақтауға шақырды.
«Бізде Ресейдің жаңа ауқымды шабуыл әзірлеп жатқаны жөнінде барлау деректері бар. Әуе қорғанысы күштері мен еліміздің аспанын қорғаушылар тәулік бойы жұмысын жалғастырады», – деді Украина басшысы.
Бұл мәлімдеме өткен демалыс күндері Ресейдің Киев облысына жасаған жаппай шабуылынан кейін айтылды. Украина тарапының мәліметінше, шабуыл кезінде 90 зымыран мен 600 ұшқышсыз ұшу аппараты қолданылған. Сондай-ақ Ресей алғаш рет 2024 жылы Днепр қаласына қарсы пайдаланған «Орешник» орта қашықтықтағы баллистикалық зымыранын қайта іске қосқаны хабарланды.
Ядролық оқтұмсық тасымалдауға қабілетті бұл зымыранды қолдану Еуропа елдері басшыларының сынына ұшырады.
Сонымен қатар Зеленский АҚШ-ты Украинаға қосымша Patriot әуе шабуылына қарсы қорғаныс жүйелерін беруге тағы да шақырды. Оның айтуынша, қазіргі жағдайда мұндай кешендер ел қауіпсіздігі үшін аса маңызды.
Украина президенті бұған дейін Дональд Трампқа қосымша оқ-дәрі мен зымыран жеткізу мәселесін қарастыруды сұрап хат жолдағаны туралы ақпарат тараған.
«Өмір сүру үшін күресіп жатқан халық үшін зымырандары жоқ Patriot кешендерін көруден ауыр нәрсе жоқ», – деген Зеленскийдің сөзін БАҚ жариялады.
Материал авторы
