«4000$ жалақы»: Астаналық жігіт Малаховқа Мьянмадағы құлдыққа қалай түскенін айтып берді
Компания ұшақ билеті мен қонақүй шығындарын төлегендіктен ешқандай күдік тумаған.
SMARTNEWS.KZ басылымының хабарлауынша, Астана тұрғыны Сәкен Қабиулла Ресейдегі танымал тележүргізуші Андрей Малахов жүргізетін бағдарламада жұмыс іздеу әрекеті қалайша қорқынышты оқиғаға айналғанын баяндады.
Қазақстандықтың айтуынша, бәрі бұрынғы жұмысынан айырылғаннан кейін жаңа қызмет іздеуден басталған. Ол интернеттегі вакансиялар сайттарының бірінен техникалық қолдау қызметінің аға маманы лауазымына жарияланған ұсынысты көрген. Жалақысы айына 3-4 мың доллар деп көрсетілген.
Сәкен вакансия талаптарын мұқият зерттеп, жұмыс беруші компанияның HR-менеджерімен байланысқа шыққан. Оның сөзінше, рекрутер барлық сұраққа кәсіби түрде жауап беріп, тіпті болашақта тұратын тұрғын үйдің фотосуреттерін де жіберген.
Күдік тудыратын ештеңе болмаған. Компания ұшақ билетін толық төлеп, Бангкокқа келгеннен кейін алғашқы үш күнге қонақүй ұсынып, тәуліктік шығындарға ақша берген. Мұның бәрі жұмыс визасын рәсімдеу үшін қажет екені айтылған.
Алайда жағдай бірнеше күннен кейін күрт өзгерген. Компания өкілдері оны еңбек келісімшартына қол қою үшін көрші қалаға апаратынын хабарлаған.
Сәкеннің айтуынша, жол барысында оны Таиланд пен Мьянма шекарасына жақын орналасқан Мае Сот қаласына қарай алып кеткен. Шамамен үш сағат жүргеннен кейін көлікке тағы бір шетелдік азамат мінген. Ол беліндегі қаруын көрсетіп, тапаншаны көліктің алдыңғы панеліне қойған.
Кейін белгілі болғандай, қазақстандықты шекарадағы өзенге жеткізіп, одан әрі қайықпен Мьянма аумағына өткізген. Сол жерде ол қылмыстық топтардың бақылауындағы арнайы IT-орталықтардың біріне жеткізіліп, еркіндігінен айырылған.
Сәкен Қабиулланың айтуынша, бастапқыда жоғары жалақы ұсынған жұмыс туралы хабарландыру сенімді көрінгенімен, оның артында адамдарды алдап, шетелге шығарып әкететін қылмыстық схема тұрған.
Материал авторы
