«Жұрттың көзінше киімімді шешті»: Хиджаб киген жолаушы Астана әуежайын сотқа бермек

SMARTNEWS.KZ басылымының хабарлауынша, Астана халықаралық әуежайында хиджаб киген жолаушы мен қауіпсіздік қызметкері арасындағы тексеру кезінде туындаған жанжал қоғам назарын аударды. Қазақстандық блогер Айша Садвакасова әуежай инспекторының әрекетін құқық бұзушылық деп санап, сотқа жүгінуге дайын екенін мәлімдеді.

Оқиға жолаушы ұшу алдындағы стандартты тексеруден өтіп жатқан кезде болған. Ол өз заттарын тапсырып, металл детектордан өткен, құрылғы ешқандай дабыл бермеген. Соған қарамастан, әуежай қызметкері оның сыртқы киімін шешуді талап еткен. Жолаушы бірнеше рет оның астында қосымша киім жоқ екенін ескерткеннен кейін, оған контактісіз сканерден өту ұсынылған.

Сканерлеуден кейін қызметкер жолаушыны шығу жолында тоқтатып, қоғамдық орында физикалық тексеру жүргізген. Бұл әрекет басқа адамдардың көзінше жасалған.

Жолаушының айтуынша, қызметкер оның үстіңгі киімін көтеріп, жеке шекараны бұзған. Ол сол сәтте оқиғаны тоқтатуды талап етіп, әуежай әкімшілігін шақыртқан. Оқиға орнына келген басшылық қызметкердің әрекетін дұрыс емес деп танып, кешірім сұраған. Кейін қауіпсіздік қызметі жағдайды тіркеу үшін нательдік камераны жедел түрде іске қосқан.

Қызметкер де кешірім білдіргенімен, әрекетін ішкі нұсқаулықтармен түсіндіруге тырысқан. Алайда жолаушы мұндай уәжді қабылдамаған.

Айша Садвакасова көп саяхат жасайтынын, бірақ мұндай жағдайға алғаш рет тап болғанын атап өтті. Ол қазір заңгерлермен бірге әуежайдың ішкі регламенттері мен тексеру тәртібін зерттеп жатыр.

Жолаушы бастапқыда оқиғаға шекара қызметін араластырғанын айтып, кейін бұл қате екенін нақтылаған. Оның айтуынша, тексеруді әуежайдың қауіпсіздік инспекторы жүргізген.

Блогер оқиғадан кейін әйелдердің жеке шекарасын қорғау қажеттігін айтып, қоғамдық кеңістік пен тексеру рәсімдері кезінде адам құқығы сақталуы тиіс екенін жеткізді.

Айта кетейік, жолаушы әуежай әрекетіне қатысты сотқа жүгінуге және прокуратураға шағым түсіруге ниетті.