«Жедел жәрдем көлігін талқандаған»: Павлодарда пышақ ұстаған ер адам фельдшерлерге шабуыл жасады
Көшеде жатқан ер адамды құтқармақ болған дәрігерлер шабуылға ұшырады.
SMARTNEWS.KZ басылымының хабарлауынша, Павлодарда көшеде жатқан ер адамға көмек көрсетуге келген жедел жәрдем қызметкерлеріне шабуыл жасалды. Оқиға салдарынан реанимобиль жүргізушісі жарақат алып, қызметтік көлік бүлінген. Бұл туралы irbistv.kz басылымы жазды.
Оқиға 10 маусым күні Назарбаев көшесіндегі №89 үйдің ауласында болған. Сағат 14:57-де «103» қызметіне өтіп бара жатқан тұрғын хабарласып, көшеде жатқан ер адам туралы мәлімет берген.
Шақырту түскеннен кейін тоғыз минут өткен соң жедел жәрдем бригадасы оқиға орнына жеткен. Алайда ер адамды тексеру барысында жағдай күрт өзгерген. Жедел жәрдем қызметінің мәліметінше, белгісіз азамат кенеттен агрессия танытып, медицина қызметкерлеріне пышақпен қоқан-лоқы жасаған.
Жанжал кезінде ол жедел жәрдем көлігінің жүргізушісін жұдырықпен ұрып, кейін реанимобиль салонына кіріп кеткен. Ішке енген соң дәрі-дәрмек ампулаларын сындырып, медициналық құрал-жабдықтарды көліктен сыртқа лақтырған.
Павлодар облыстық жедел медициналық жәрдем станциясы зардап шеккен қызметкерлердің құқық қорғау органдарына арыз жазғанын хабарлады.
Оқиғаға қатысты Павлодар облыстық полиция департаменті түсініктеме берді.
Ведомство мәліметінше, жедел жәрдем қызметкерлеріне күш қолдану немесе күш қолданамын деп қорқыту фактісі бойынша қылмыстық іс қозғалған.
Полиция күдіктіні ұстап, арнайы емдеу мекемесіне орналастырғанын мәлімдеді. Қазір оқиғаның барлық мән-жайы анықталып жатыр.
Материал авторы
