«Досын құтқармақ болған»: БҚО-да үш мектеп түлегі суға кетіп көз жұмды
Жергілікті тұрғындар қаза болған оқушылардың сабақта үздік болғанын айтты.
SMARTNEWS.KZ басылымының хабарлауынша, Батыс Қазақстан облысының Жаңғала ауданында орналасқан Кіші Өзенде үш мектеп түлегінің қаза болуына қатысты оқиғаның мән-жайы белгілі болды. Бұл туралы Qaz365.kz басылымы жазды.
Алдын ала деректерге сәйкес, 17 жастағы Ұлдана Рафих, 16 жастағы Гүлхан Тұраш және 16 жастағы Нұртаc Жолдығали қорытынды емтихандардың аяқталуын табиғат аясында атап өтпек болған. Куәгерлердің айтуынша, алғаш болып көмекке жақын маңда жүрген жасөспірімдер ұмтылған. Олардың бірі суға түскендердің бірін жағаға шығаруға көмектескенімен, үш оқушыны аман алып қалу мүмкін болмаған.
Qaz365.kz басылымына жергілікті тұрғындар сұхбат беріп, өзен маңында барлығы бес жасөспірім — үш қыз және екі ұл болғанын айтты. Ауылдықтардың сөзінше, қыздардың бірі өзге балаларды құтқаруға әрекеттенген, алайда өзі де суға батып кеткен.
«Барлығы да жақсы оқитын балалар еді. Биыл сыныпта небәрі тоғыз түлек болатын. Олардың бесеуі үйлерінің жанындағы өзенге демалуға барған. Бір қыз басқаларды құтқармақ болған, ал бір ұл солармен бірге қаза тапты. Бұл – бүкіл ауыл үшін өте ауыр қайғы», – дейді жергілікті тұрғын.
Тағы бір ауыл тұрғыны жасөспірімдерді демалыс орнына «Нива» көлігімен үлкен жастағы таныстары жеткізгенін айтқан.
«Ол олардың суға түсетінін білмеген. Кейін қайғылы жағдай басталды. Екеуін құтқарып қалды, үшеуі суға кетті. Қаза болғандардың арасында оның қарындасы да бар», – деп мәлімдеді ол.
Құтқарушылардың мәліметінше, екінші мәйіт 19:25-те, үшіншісі 19:42-де судан шығарылған. Қазіргі уақытта оқиғаның барлық мән-жайы анықталуда, құқық қорғау органдары тергеу жүргізіп жатыр.
Материал авторы
