«Шашынан сүйреп, тізерлеткен»: Алматыда автобустағы жанжал аялдамада төбелеске ұласқан

Оқиға 2026 жылғы 8 маусымда шамамен сағат 11:40-та «ҚАЗдорНИИ» аялдамасында болған. Жәбірленушінің айтуынша, жанжал қоғамдық көлікте басталған.

Әлеуметтік желіде жарияланған жазба авторының мәліметінше, ол автобуста бір әйелдің басқа жолаушыға агрессия танытқанын байқап, жағдайды телефонға түсіре бастаған. Бұл әрекет әйелдің ашуын келтірген.

Қыздың айтуынша, әйелдің баласы түсірілімді байқап, анасына айтқан. Осыдан кейін әйел ашуға беріліп, телефонға видео түсіріп тұрған қызға шабуыл жасаған.

«Ол мені күшпен автобустан түсіріп, басымнан ұрды, шашымнан сүйреп, тізерлетіп отырғызды. Видеоны өшіруді талап етті», – делінген жарияланымда.

Жәбірленуші шабуылдан кейін дәрігерлерге барғанын айтқан. Медициналық тексеру кезінде миы шайқалуы мүмкін екені және денесінде көгерген жерлер бары анықталған. Осы жағдай бойынша полицияға арыз берілген.

Оқиға кезінде куәгерлер араласып, жанжалға нүкте қойған. Соның арқасында қыз қайтадан автобусқа отыра алған.

Жәбірленуші әлеуметтік желі арқылы шабуыл жасаған әйелдің кім екенін анықтауға және оқиғаны көрген адамдарды табуға көмектесуді сұраған.

Алматы полиция департаменті ақпаратты растады. Алатау аудандық полиция басқармасы аталған факт бойынша қылмыстық іс қозғаған.

«Қазір болған жағдайдың барлық мән-жайын анықтауға және заңды процессуалдық шешім қабылдауға бағытталған тергеу әрекеттері жүргізіліп жатыр», – деді Алматы қаласы полиция департаментінің ресми өкілі Салтанат Әзірбек.

Тергеу жалғасуда.