Мұнай әлі де басты орында: Қазақстанның сыртқы сауда айналымы 44,9 млрд долларға өсті

SMARTNEWS.KZ басылымының хабарлауынша, 2026 жылдың қаңтар-сәуір айларында Қазақстанның сыртқы сауда айналымы 44,9 млрд долларды құрады. Бұл көрсеткіш өткен жылдың сәйкес кезеңімен салыстырғанда 7,9 пайызға артқан. Бұл туралы Ұлттық статистика бюросының мәліметіне сүйенген «Kazinform» басылымы жазды.

Төрт айдың қорытындысы бойынша Қазақстанның тауар экспорты 24 млрд долларға жетіп, бір жыл бұрынғы көрсеткіштен 5 пайызға өскен. Ал импорт көлемі 11,3 пайызға артып, 20,9 млрд долларды құрады.

Осылайша, елдің сауда балансында оң көрсеткіш сақталғанымен, шетелден сатып алынатын тауарлардың өсім қарқыны экспортқа қарағанда жоғары болып отыр.

Еуразиялық экономикалық одақ елдерімен сауда көлемі де ұлғайған. Қазақстанның ЕАЭО мемлекеттерімен тауар айналымы 13,3 пайызға өсіп, 9,9 млрд долларға жетті.

Алайда бұл бағыттағы экспорт 7,9 пайызға төмендеген. Керісінше, одақ елдерінен келетін импорт 24,1 пайызға артқан. ЕАЭО аясындағы негізгі сауда серіктесі — Ресей. Оның үлесіне өзара сауда көлемінің 87,6 пайызы тиесілі.

Қазақстанның сыртқы сауда құрылымында шикізаттық бағыт әлі де басым. Экспорттың шамамен жартысына жуығын, нақтырақ айтқанда 44 пайызын шикі мұнай құрайды.

Сондай-ақ шетелге шығарылатын негізгі тауарлардың қатарында тазартылған мыс, мыс кені мен концентраттары, ферроқорытпалар және бидай бар.

Импорт құрылымында жеңіл көліктер, газ тәрізді көмірсутектер, дәрі-дәрмек, телефон аппараттары және энергетикалық жабдықтар көш бастап тұр.

Қазақстанның басты экспорттық бағыттары — Қытай, Италия және Ресей. Ал импорт бойынша негізгі серіктестер қатарында Ресей мен Қытай бар. Осы екі ел Қазақстанға келетін барлық импорттың 60 пайыздан астамын қамтамасыз етеді. Сонымен қатар Германия, АҚШ, Оңтүстік Корея және Түркия маңызды жеткізушілер қатарында.