Михаил Шайдоров Олимпиада алтыны үшін 250 мың доллар алды
Үкімет Олимпиада жүлдегерлеріне резервтік қордан қаржы бөлгенін ресми түрде растады.
SMARTNEWS.KZ басылымының хабарлауынша, Қазақстан үкіметі 2026 жылы Италияның Милан және Кортина-д’Ампеццо қалаларында өткен XXV қысқы Олимпиада ойындарының жүлдегерлеріне ақшалай сыйақы төлеу туралы қаулы қабылдады. Бұл туралы «Туризм және спорт министрлігінің» баспасөз қызметі мәлімдеді.
Құжатқа сәйкес, төлемдер үкімет резервінен бөлінген қаражат есебінен жүзеге асырылған. Сыйақы Олимпиада чемпионы атанған мәнерлеп сырғанаушы Михаил Шайдоровқа және үздік алтылыққа енген конькиші Надежда Морозоваға берілді.
Қолданыстағы заңнамаға сай, Михаил Шайдоров 250 мың АҚШ долларын, ал Надежда Морозова 5 мың доллар көлемінде сыйақы алды.
Сонымен қатар спортшылардың бес жаттықтырушысы да қаржылай марапатқа ие болды. Олардың қатарында жеке, алғашқы және бас бапкерлер бар.
Бұдан бөлек, Олимпиада жүлдегерлеріне жергілікті атқарушы органдар тарапынан қосымша қолдау көрсетіледі. Атап айтқанда, әкімдіктер спортшыларды коммуналдық тұрғын үй қорынан тегін баспанамен қамтамасыз етпек.
Жалпы алғанда, төлемдер екі спортшы мен бес жаттықтырушыға берілді, ал жалпы қаржы көлемі 250 миллион теңгеден асты.
Айта кетейік, Михаил Шайдоров XXV қысқы Олимпиада ойындарында Қазақстан тарихындағы алғашқы алтын медальді жеңіп алған болатын.
Материал авторы
