«Шындықты бәрібір анықтаймыз»: Беларусь президенті дрон соққысына Украинаны кінәлады

SMARTNEWS.KZ басылымының хабарлауынша, Беларусь президенті Александр Лукашенко Украина тарапына тиесілі деп айтылған дронның балалар отырған автобусқа соққы жасаған оқиғаға қатысты мәлімдеме жасады. Бұл туралы БелТА жазды.

Лукашенко 2026–2030 жылдарға арналған Қарулы күштерді дамыту және құрылымын түзету жоспарлары жөніндегі баяндама тыңдаған.

«Мен бірнеше рет ескерткенмін – бүгінгі соғыс алыс жерде емес. Ол біздің қасымызда, кейде тіпті өте жақын. Мұның дәлелі – түрлі арандатулар. Бұл жай ғана арандату емес, кей мемлекеттердің соғыс кезіндегі келісімдерді бұзуы. Мысалы, Старобельскідегі жатақханаға жасалған соққы, онда адамдар, тіпті балалар да қаза тапты. Сондай-ақ Брянск облысында біздің автобусқа жасалған дрон соққысы. Біз әскери адамдар ретінде мұның бәрін түсінуіміз керек», – деді ол.

Президент Брянск облысындағы автобусқа жасалған шабуылға да тоқталды.

«Біз асығыс қорытынды жасамаймыз, бірақ нақты факт бар – бұл украиналық дрон. Украинадан ұшырылған дрон. Сол дрондардың бірі, бақытымызға қарай, аса қуатты емес, автобусқа соққы жасаған. Соның салдарынан бір адам қаза тауып, балалар зардап шекті», – деді Лукашенко.

Оның айтуынша, Беларусь арандатуға берілмейді және елді соғысқа тартуға тырысқандардың әрекеті өздеріне ауыр тиеді.

«Біз сабырлы әрекет етеміз. Беларусьтің тыныш мемлекет болғаны біреулерге ұнамайды. Сол себепті осындай жағдайлар болып жатыр. Түрлі мәлімдемелер, ақталулар айтылады. Бірақ бізге шындық керек. Біз бұл ақиқатты міндетті түрде анықтаймыз», – деді ол.

Лукашенко елдің оңтүстік шекарасын күшейту жөнінде тапсырма берген.