«Маған қызымды қайтарсын»: Алматыдағы жол апатында қаза тапқан қыздың әкесі кешірім беруден бас тартты

SMARTNEWS.KZ басылымының хабарлауынша, Алматыдағы Әл-Фараби даңғылындағы адам өліміне әкелген жол апаты бойынша сотта қаза тапқан Томирис Қыдырбектің әкесі жауап берді. Ол айыпталушы Александр Пакты кешірмейтінін және онымен татуласуға ниеті жоқ екенін мәлімдеді.

Сот марқұм қыздың әкесін жәбірленуші деп танып, оның көрсетілімдерін тыңдады. Ер адам сот отырысына бейнебайланыс арқылы қатысты.

Сұрақтарға жауап беру кезінде ол эмоциясын жасыра алмай, қызының өлімін әлі күнге дейін қабылдай алмай жүргенін айтты.

Сот оның талап-тілегін сұрағанда, ер адам: «Ең алдымен қызымды қайтарсын» деп жауап берген.

Жәбірленушінің сөзінше, ол жерлеу рәсімдерін ұйымдастырып жүрген кезде бұрынғы әйелі материалдық өтемақы алған және өзінің келісімінсіз айыпталушымен татуласуға барған. Ал өзі Александр Пакты кешіруге дайын емес екенін жеткізді.

Бұған дейін қаза болғандардың кейбір туыстары сотта айыпталушыға шағымы жоқ екенін айтып, оны бас бостандығынан айырмауды сұраған.

Олар мұндай шешімді жақындарын қайтару мүмкін еместігімен түсіндірген.

«Мен кешірім бермесем де, Пак 100 жылға сотталса да, оның маған қандай пайдасы бар? Қызым бәрібір қайтып келмейді», — деді марқұмдардың бір туысы.

Сонымен бірге сот отырысында бұрынғы полиция басшысының жүргізушісі де куәгер ретінде жауап берді. Оны сот залына кісенмен жеткізген.

Жәбірленуші тараптың адвокаты куәгердің бұған дейін берген жауаптарын жариялады. Онда ер адам басшысын үйіне жеткізгеннен кейін қызметтік көлікпен Александр Пакпен кездесуге мейрамханаға барғаны айтылған.

Куәгер көлікті басшылықтың рұқсатынсыз пайдаланғанын мойындағанымен, алкоголь ішпегенін және Пакпен жарысқа қатыспағанын мәлімдеді.

Сотта ол жұмыс уақыты аяқталғаннан кейін қызметтік көлікті пайдалануға құқығы болмағанын растады. Сондай-ақ оқиғадан кейін аурухана маңында көліктің арнайы нөмірлерін ауыстырғанын айтты.