«Енді достасқым келмейді»: Трамп Мелонимен арадағы жанжалды ушықтырды
АҚШ президенті Италия премьерін сынап, ауыр сөздер айтты.
SMARTNEWS.KZ басылымының хабарлауынша, АҚШ президенті Дональд Трамп Италия премьер-министрі Джорджа Мелонимен арадағы дау туралы тағы бір мәлімдеме жасап, онымен қайта жақындасуға ниеті жоқ екенін айтты.
Трамп өзінің Truth Social желісіндегі парақшасында Мелониді қайта сынға алды. Ол Италия үкімет басшысы Францияда өткен G7 саммиті кезінде өзімен бірге суретке түсуге бірнеше рет өтініш жасағанын тағы қайталады.
АҚШ президентінің сөзінше, Мелонидің Италиядағы қолдауы төмендеп жатыр. Ол бұған Римнің АҚШ-тың Иранның ядролық қару жасауына жол бермеу бағытындағы әрекеттеріне жеткілікті қолдау көрсетпегенін себеп ретінде атады.
Трамп сондай-ақ Италияның америкалық күштерге өз аумағындағы әуе инфрақұрылымын пайдалануға рұқсат бермеуін сынға алды.
«АҚШ Италияны және НАТО-дағы басқа да одақтастарын қорғауға қыруар қаржы жұмсайды. Ал қазір АҚШ-тың Иранға қатысты жеңісінен кейін ол қайтадан достасқысы келеді. Жоқ, рақмет!» — деп жазды Трамп.
Бұған дейін екі саясаткер арасында G7 саммитінен кейін дау туған еді. Трамп Мелони оны суретке түсуге «жалынғанын» айтқан, алайда Италия премьер-министрі бұл мәлімдемені жоққа шығарып, оны шындыққа жанаспайды деп атаған.
Жанжалдан кейін Италия сыртқы істер министрі Антонио Таяни АҚШ-қа жоспарланған сапарын кейінге қалдырған.
Қазіргі таңда Вашингтон мен Рим арасындағы дипломатиялық қарым-қатынасқа қатысты пікірталас жалғасып жатыр.
Материал авторы
